ԳԴՀ դաշնային կառավարության Մարդու իրավուքների քաղաքականության և մարդասիրական օգնության հարցերով հանձնակատար Մարկուս Լյոնինգի հայտարարությունը Ադրբեջանում քաղբանտարկյալների համաներման մասին

22 մարտի, 2012

Ս.թ. մարտի 21-ին ԳԴՀ Մարդու իրավուքների քաղաքականության և մարդասիրական օգնության հարցերով հանձնակատար Մարկուս Լյոնինգը հայտարարություն է տարածել Ադրբեջանի նախագահի շնորհած համաներման կապակցությամբ: Նա ողջունել է նախագահ Հ. Ալիևի որոշումը մինչև գարնանային արձակուրդները 62 բանտարկյալների ազատ արձակելու մասին:
Քաղբանտարկյալներին ազատ արձակելու կոչով Ադրբեջանի իշխանություններին էր դիմել ԳԴՀ ԱԳ նախարար Գ. Վեստերվելլեն Բաքու կատարած իր այցի ընթացքում: Հայտարարության մեջ, միաժամանակ, ափսոսանք է հայտնվում առ այն, որ Ադրբեջանի նախագահը քաջություն չի ցուցաբերել ազատելու բոլոր քաղբանտարկյալներին: Ադրբեջանի նախագահի համար մեծ հնարավորություն կլիներ համաներում շնորհել և հստակորեն հարգել Մարդու իրավունքների եվրոպական կոնվենցիան:
Հանձնակատարը կոչ է անում Ադրբեջանի իշխանություններին առանց հապաղելու ազատ արձակել բոլոր քաղբանտարկյալներին և պաշտպանել խոսքի ազատության իրավունքը:
ԳԴՀ ԱԳՆ մամլո հաղորդագրության մեջ նշվում է, որ մի շարք իրավապաշտպան կազմակերպությունների պնդմամբ` տասնյակ քաղաքացիներ շարունակում են մնալ ազատազրկման մեջ իրենց երկրում ազատության և ժողովրդավարության համար պայքարելու պատճառով: 55 հոգի ազատ են արձակվել բանտերից, որոնցից երկու քաղբանտարկյալներ 2011թ. ապրիլի 2-ի բողոքի երթի մասնակիցներ են:
Մ. Լյոնինգը եզրահանգում է, որ համաներման սպասելիքները չեն արդարացել, քանի որ դիտորդների ենթադրությամբ` 2011թ. ապրիլի 2-ի ցույցի 13 մասնակիցներից եթե ոչ բոլորը, ապա գոնե շատերը պետք է ազատ արձակվեին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր