Ընդունելություն՝ նվիրված Հայաստանի Հանրապետության Անկախության օրվան և Հայաստանի և Գերմանիայի միջև դիվանագիտական հարաբերությունների հաստատման 30-ամյակին

22 սեպտեմբերի, 2022

Ս.թ. սեպտեմբերի 21-ին Բեռլինում տեղի ունեցավ ընդունելություն՝ նվիրված Հայաստանի Հանրապետության Անկախության օրվան և Հայաստանի և Գերմանիայի միջև դիվանագիտական հարաբերությունների հաստատման 30-ամյակին:

Շնորհավորելով ՀՀ Անկախության տոնի կապակցությամբ՝ ԳԴՀ-ում ՀՀ դեսպան Վիկտոր Ենգիբարյանն ընդգծեց, որ «Անկախությունը և ինքնիշխանությունը որևէ երկրի հենց այնպես տրված չէ. այն ոչ թե պահ է, այլ գործընթաց։ Իսկ այդ գործընթացը պահանջում է մշտական աշխատանք, մշտական զարգացում, ջանք»։

Դեսպանն իր խոսքում անդրադարձավ նաև Ադրբեջանի զինված ուժերի կողմից Հայաստանի ինքնիշխան տարածքի նկատմամբ սեպտեմբերի 13-ի կեսգիշերին սանձազերծած ագրեսիային՝ որակելով այն որպես հարված եվրոպական խաղաղության կարգին և միջազգային իրավունքին։

Անդրադառնալով ՀՀ և ԳԴՀ միջև դիվանագիտական հարաբերությունների հաստատման 30-ամյակին՝ դեսպան Ենգիբարյանն իր խոսքում ընդգծեց ՀՀ և ԳԴՀ-ի միջև հարաբերությունների դինամիկ զարգացումը տարբեր մակարդակներում: Այս համատեքստում դեսպանը կարևորեց ԳԴՀ 2030թ. տնտեսական և զարգացման ռազմավարության մեջ Հայաստանին ներառելու գերմանական կառավարության որոշումը, որը վկայում է հայ-գերմանական հարաբերությունների նոր որակի մասին:

Անկախության օրվա առիթով շնորհավորական խոսքով հանդես եկավ նաև ԳԴՀ ԱԳՆ Արևելյան Եվրոպայի, ՌԴ, Հարավային Կովկասի և Կենտրոնական Ասիայի երկրների հարցերով քաղաքական տնօրեն Մաթիաս Լյութենբերգը: Վերջինս իր խոսքում անդրադարձավ տարբեր ոլորտներում հայ-գերմանական փոխշահավետ համագործակցությանը և երկկողմ հարաբերությունների շարունակական զարգացմանը:

Ողջույնի խոսքով հանդես եկավ նաև Սաքսոնիա-Անհալթ երկրամասի Լանդթագի նախագահ Գուննար Շելլենբերգերը։

Երկու երկրների օրհներգերը հնչեցին Բեռլինի պետական նվագախմբի Knobelsdorff անսամբլի կատարմամբ։

Միջոցառմանը ներկա էին ԳԴՀ արտաքին գործերի և մի շարք այլ նախարարությունների, երկրամասերի խորհրդարանների ներկայացուցիչներ, Բունդեսթագի պատգամավորներ, քաղաքապետներ, Գերմանիայում հավատարմագրված մի շարք երկրների դեսպաններ, դիվանագիտական կորպուսի, գիտակրթական և տնտեսական, ինչպես նաև հայ համայնքային կազմակերպությունների ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր