Գերմանահայկական համերգաշար Բադեն-Վյուրթեմբերգ երկրամասում

26 հոկտեմբերի, 2023

2012 թվականից Կարլսրուհե և Բադեն-Բադեն քաղաքներում անցկացվող համերգաշարի հիմնական նպատակն է հայկական դասական երաժշտության տարածումը Գերմանիայում և մշակութային երկխոսության խթանումը: Համերգաշարի անցկացմանը աջակցում են նաև Գերմանիայում ՀՀ դեսպանությունը, Բադեն-Վյուրթենբերգ երկրամասում ՀՀ պատվո հյուպատոսությունը, Կարլսրուհեի քաղաքապետարանը և այլ կազմակերպություններ։

Համերգաշարի բացմանը ներկա էին ինչպես պաշտոնատար անձինք, այնպես էլ հայ համայնքի ներկայացուցիչներ և բազմաթիվ արվեստասերներ: Բունդեսթագի պատգամավոր Նիկոլաս Ցիփելիուսը, շնորհակալություն հայտնելով Գերմանահայկական Երաժշտական Միության նավագահ Անի Աղաբեկյանին տարիների մեծ աշխատանքի համար, խոսեց նաև Լեռնային Ղարաբաղի շուրջ ծավալված իրադարձությունների, բարդ ժամանակաշրջանում հայ-գերմանական հարաբերությունների և Հայաստանին օգնության ձեռք մեկնելու մասին:

Անի Աղաբեկյանը շնորհակալություն հայտնեց համերգաշարի աջակիցներին և առաջարկեց ներկա գտնվողներին աջակցել Լեռնային Ղարաբաղից բռնի տեղահանված քաղաքացիներին։

Այս տարի համերգաշարին միացել են մի շարք անվանի երաժիշտներ, ինչպիսիք են ջութակահար Մարտին Յավրյանը, թավջութակահար Լևոն Մուրադյանը, դաշնակահարուհի Զոնթրաուդ Շպայդելը, Քոհ Գաբրիել Քամեդան և այլոք:

Համերգաշարի ընթացքում գերմանական ստեղծագործությունների կողքին նաև հնչում են հայ կոմպոզիտորներ Հովունցի, Խաչատրյանի, Բաբաջանյանի և այլ հայտնիների ստեղծագործություններ:

Գերմանական ԶԼՄ-ներում ևս շատ դրական անդրադարձներ կան համերգաշարի վերաբերյալ:

Հաջորդ համերգները կկայանան նոյեմբերի 11-ին, 26-ին և դեկտեմբերի 9-ին Կարլսրուհե և Բադեն-Բադեն քաղաքներում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր