Հունաստանի առաջին դեսպանը ՀՀ-ում իր գիրքը ներկայացրեց Բեռլինում

10 մայիսի, 2012

Ս.թ. մայիսի 9-ին Բեռլինի հունական մշակույթի կենտրոնում տեղի ունեցավ Սևծովյան տնտեսական համագործակցության կազմակերպության գլխավոր քարտուղար, ՀՀ-ում Հունաստանի առաջին դեսպան Լեոնիդաս Խրիզանտոպոլոսի “Կովկասյան ժամանակագրություն” գերմաներեն լեզվով տպագրված գրքի շնորհանդեսը: Գիրքը արտացոլում է 1993-1994թթ. Հայաստանում որպես Հունաստանի առաջին դեսպան աշխատած հեղինակի հուշերը: Միջոցառմանը ներկա էին ԳԴՀ-ում Հունաստանի դեսպան Դ.Ռալլիսը, ԳԴՀ-ում ՀՀ դեսպան Ա. Մարտիրոսյանը, դիվանագետներ, հայկական և հունական համայնքների ներկայացուցիչներ:

Միջոցառումը բացեց Բեռլինի հունական մշակույթի կենտրոնի տնօրեն Է. Իկոնոմուն: Ողջույնի խոսքում դեսպան Ա. Մարտիրոսյանը բարձր գնահատեց Լ. Խրիզանտոպոլոսի դիվանագիտական առաքելությունը Հայաստանում և նրա գործունեությունը Սևծովյան տնտեսական համագործակցության կազմակերպության գլխավոր քարտուղարի պաշտոնում: «Ուրախ եմ, որ գրքում տարբեր առիթներով Խրիզանտոպոլոսը արտահայտում է իր վառ հիշողությունները Հայաստանի և հայ ժողովրդի վերաբերյալ»,- նշեց դեսպան Ա. Մարտիրոսյանը:

Իր հիշողությունները միջոցառման մասնակիցների հետ կիսեց Լեոնիդաս Խրիզանտոպոլոսը: «Որպես ՍԾՏՀ կազմակերպության ղեկավար մի քանի անգամ այցել եմ Հայաստան և տպավորված եմ անցած 20 տարիների արդյունքներից: Անհրաժեշտ է ձեռնարկել բոլոր միջոցները, որպեսզի զարգացման արդյունքները ավելի շոշափելի լինեն նաև գյուղական վայրերում»,- մասնավորապես նշեց գրքի հեղինակը:

Ելույթներից հետո միջոցառման մասնակիցները հարցեր ուղղեցին գրքի հեղինակին:
Գիրքը անգլերեն լեզվով հրատարակվել է 2002թ. Կանադայում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր