Հայ-գերմանական քաղաքական խորհրդակցություններ Բեռլինում

01 հոկտեմբերի, 2012

Սեպտեմբերի 27-28-ին ՀՀ և ԳԴՀ Արտաքին գործերի նախարարությունների միջև հերթական քաղաքական խորհրդակցություններն անցկացնելու նպատակով Բեռլինում էր գտնվում ՀՀ Արտաքին գործերի փոխնախարար Զոհրաբ Մնացականյանի գլխավորած պատվիրակությունը: Գերմանական կողմից քաղաքական խորհրդակցությունները վարում էր ԳԴՀ ԱԳՆ Արևելյան Եվրոպայի, Կովկասյան տարածաշրջանի և Կենտրոնական Ասիայի հարցերով հանձնակատար Անթիե Լեենդերթսեն:  

Կողմերը քննարկեցին երկկողմ հարաբերությունների զարգացման հեռանկարներն ու հնարավորությունները, այդ թվում` քաղաքական, տնտեսական, մշակութային, գիտակրթական, հումանիտար և հյուպատոսական հարցեր, ինչպես նաև Հայաստան-ԵՄ  հարաբերությունները:  

Կողմերը քննարկեցին նաև տարածաշրջանային զարգացումները և այդ  համատեքստում Ադրբեջանի նախագահի կողմից Ռամիլ Սաֆարովի ներման հարցը և դրա հնարավոր հետևանքները բանակցային գործընթացում:   

Այցի շրջանակներում փոխնախարար Մնացականյանը հանդիպեց ԳԴՀ վարչապետի աշխատակազմի արտաքին քաղաքականության և անվտանգության հարցերով վարչության տարածաշրջանային բաժնի վարիչ դոկտոր Քրիստոֆ Իսրանգի և ԳԴՀ Բունդեսթագի Արտաքին  հարաբերությունների հանձնաժողովի նախագահ Ռուպրեխտ Պոլենցի հետ: ԱԳ նախարարի տեղակալ Մնացականյանը Բեռլինի  Գիտություն և քաղաքականություն հիմնադրամի (SWP) կենտրոնակայանում  հանդես եկավ Հայաստանի արտաքին քաղաքականության վերաբերյալ  բանախոսությամբ, որին հետևեցին քննարկումներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր