ՀՀ վարչապետ Տիգրան Սարգսյանի աշխատանքային այցը Գերմանիա

09 դեկտեմբերի, 2012

Ս.թ. դեկտեմբերի 6-8–ը կայացավ ՀՀ վարչապետ Տիգրան Սարգսյանի գլխավորած պատվիրակության աշխատանքային այցը Գերմանիայի Դաշնային Հանրապետություն:

Կառավարության ղեկավարը Ֆրանկֆուրտում մասնակցեց գերմանական «Commerzbank»-ում կազմակերպված հայ-գերմանական գործարար համաժողովին, որին ներկա էին «Commerzbank»-ի ֆինանսական հաստատությունների ղեկավար Պիեր Ֆիշերը, գերմանական և հայկական ընկերությունների ներկայացուցիչներ: Համաժողովին Հայաստանից ներկա էին 15 ընկերություններ, որոնք ներկայացնում են բանկային, բարձր տեխնոլոգիաների, տեղեկատվական տեխնոլոգիաների, մարտկոցների արտադրության, էներգետիկայի, հանքարդյունաբերության, գյուղատնտեսության ոլորտները: Տիգրան Սարգսյանը երկկողմ հանդիպում ունեցավ «Commerzbank»-ի կառավարման խորհրդի անդամ Միքայել Ռոյթերի հետ:

Հայ-գերմանական գործարար համաժողովի շրջանակում ՀՀ վարչապետը Ֆրանկֆուրտում հադիպեց նաև «Oracle» ընկերության փոխնախագահ Ալան Բլանքին: Ընկերության ներկայացուցիչների հետ քննարկվել է «Oracle»-ի ներգրավման հնարավորությունը հայկական տեղեկատվական տեխնոլոգիաների ոլորտում: Ընկերությանը ներկայացվել են մի շարք ծրագրեր, որոնք կարող են հետաքրքրական լինել համագործակցության համար` ՀՀ-ում ստեղծվող ազատ տնտեսական գոտի, Գյումրու տեխնոպարկի, կրթական նախագծեր: Ալան Բլանքն ընդգծել է, որ իրենք հետաքրքրված են Հայաստանում ծրագրեր իրականացնելու գործում և ծանոթ են արդեն իսկ մեկնարկած և գործող բազմաթիվ այլ ընկերությունների ծրագրերի: «Oracle» ընկերությունն եվրոպական շուկայի առաջատարներից է ՏՏ լուծումների, տվյալների և էլեկտրոնային կառավարման ոլորտներում ունեցած իր հաջողություններով:

Հայ-գերմանական համաժողովի շրջանակներում մեկ այլ հանդիպման ժամանակ, հայաստանյան «Լոռի Ամրոց» ՍՊԸ-ի, «Voith Hydro» ՍՊԸ-ի, «Sparkasse» բանկի և «COMMIT Group»-ի միջև ստորագրվել է համաձայնագիր «Լոռի Բերդ Հիդրոէլեկտրոկայանի» ծրագրի ֆինանսավորման և կառուցման վերաբերյալ:

Դեկտեմբերի 7-ին Տիգրան Սարգսյանն այցելեց Մայնց քաղաք, որտեղ հանդիպում ունեցավ Ռայնլանդ-Պֆալց երկրամասի վարչապետ Քուրտ Բեկի հետ: Հանդիպման ընթացքում ՀՀ կառավաության ղեկավարն ու Ռայնլանդ-Պֆալց երկրամասի վարչապետը քննարկեցին երկկողմ համագործակցության հնարավորությունները, մասնավորապես` գյուղատնտեսության, ճշգրիտ սարքաշինության, տուրիզմի, դեղագործության ոլորտներում: Քննարկվեցին նաև փոքր և միջին ձեռնարկատիրության համատեղ ծրագրերի իրականացման հեռանկարները:

Այնուհետև կառավարության ղեկավարը մասնակցեց Մայնց քաղաքի «Գութենբերգ» թանգարանում կազմակերպված հայ գրատպության 500-ամյակին նվիրված ցուցահանդեսին: Շնորհակալություն հայտնելով երկրամասի վարչապետին և Մայնցի քաղաքապետ Միքաել Էմբլինգին՝ միջոցառմանը մասնակցելու և գաղափարի իրականացման հարցում ցուցաբերած աջակցության համար, Տիգրան Սարգսյանը նշել է, որ իր համար մեծ հաճույք և պատիվ է մասնակցել այս հիանալի ցուցահանդեսին: ՀՀ վարչապետն իր երախտագիտությունն է հայտնել նաև ցուցահանդեսի կազմակերպիչներին, «Գութենբերգ» թանգարանին՝ հայկական մշակույթը գերմանական հասարակությանը ներկայացնելու բացառիկ հնարավորություն ստեղծելու համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր