Հայոց Ցեղասպանության զոհերի հիշատակին նվիրված խաչքարի բացում Հալլե քաղաքում

11 մայիսի, 2015

Մայիսի 10-ին ԳԴՀ Սաքսոնիա-Անհալթ երկրամասի Հալլե քաղաքի իշխանությունների և հայ համայնքի միասնական ջանքերով տեղի ունեցավ Հայոց Ցեղասպանության զոհերի հիշատակը հավերժացնող խաչքարի բացումը և Օրհնության կարգը՝ Ձեռամբ Հայ Առաքելական Եկեղեցու Գերմանիայի Թեմի Առաջնորդ Գարեգին Արքեպիսկոպոս Բեկչյանի։

Միջոցառմանը ներկա էին Սաքսոնիա-Անհալթի մշակույթի նախարար Շտեֆան Դորգելոհը, Հալլեի քաղաքապետ դոկտոր Բերնդ Վիգանդը, ԳԴՀ-ում ՀՀ գործերի ժամանակավոր հավատարմատար Աշոտ Սմբատյանը, Երևանի Սուրբ Գրիգոր Լուսավորիչ եկեղեցու հոգևոր տեսուչ և Երևանի պետական համալսարանի Աստվածաբանության ֆակուլտետի դեկան Անուշավան եպիսկոպոս Ժամկոչյանը, Սաքսոնիա-Անհալթ երկրամասի եկեղեցական աշխատանքների վարչության ատենապետ Յուրգեն Դիտրիխը, ԳԴՀ Բունդեսթագի և Լանդթագերի պատգամավորներ, հայ համայնքի ներկայացուցիչներ։

Ողջույնի խոսքով հանդես եկան Հալլեի քաղաքապետը, Սաքսոնիա-Անհալթի մշակույթի նախարարը, ԳԴՀ-ում ՀՀ գործերի ժամանակավոր հավատարմատարը եւ Սաքսոնիա-Անհալթ երկրամասի հայ համայնքի վարչության ատենապետ Հարություն Մանուկյանը։

Բացման արարողությունից հետո Շ. Դորգերլոհը, Ա. Սմբատյանը, Յ. Դիտրիխը, Դ. Գրիգորյանը և Հերման Գոլցի այրին այցելեցին հայ ժողովրդի մեծ բարեկամ Հերման Գոլցի շիրիմին:

Նույն օրը երեկոյան Հալլե-Վիթեմբերգի Մարտին Լյութերի անվան համալսարանի պատմական ընդունելությունների սրահում կայացավ “Առ գետս Բաբելացւոց” խորագրով համերգ` նվիրված Հայոց Ցեղասպանության հարյուրամյա տարելիցին:
Համերգից առաջ ողջույնի խոսքով հանդես եկավ համալսարանի ռեկտոր պրոֆ. Ուդո Շթրեթերը, ինչից հետո կատարվեցին Կոմիտաս Վարդապետի ստեղծագործությունները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր