Դեսպան Սմբատյանի աշխատանքային այցը Գերմանիայի Սաքսոնիա-Անհալթ երկրամաս

01 հոկտեմբերի, 2015

Սեպտեմբերի 30-ին կայացավ Գերմանիայում ՀՀ դեսպան Աշոտ Սմբատյանն աշխատանքային այցը Գերմանիայի Սաքսոնիա-Անհալթ երկրամասի մայրաքաղաք Մագդեբուրգ:

Այցի շրջանակներում դեսպանը հանդիպում ունեցավ Սաքսոնիա-Անհալթ երկրամասի վարչապետ Ռայներ Հազելոֆի հետ: Զրույցի ընթացքում կողմերը քննարկեցին Հայաստանի հետ երկրամասի համագործակցության հեռանկարները՝ հատկապես տնտեսության ու զբոսաշրջության բնագավառներում և հետաքրքրություն ներկայացնող մի շարք այլ խնդիրներ: Հանդիպման ավարտին դեսպան Սմբատյանը գրառում կատարեց Սաքսոնիա-Անհալթ երկրամասի կառավարության պատվավոր հյուրերի գրքում:

Այցի ընթացքում դեսպանին հյուրընկալեց նաև Սաքսոնիա-Անհալթ երկրամասի խորհրդարանի (Լանդթագի) նախագահ Դեթլեֆ Գյուրթը: Զրուցակիցները բարձր գնահատեցին Հայաստանի և Սաքսոնիա-Անհալթ երկրամասի միջև գիտակրթական և մշակութային հարաբերությունների ներկայիս մակարդակը և կարևորեցին երկկողմ փոխգործակցության զարգացումը նաև տնտեսության բնագավառում:

Մագդեբուրգ կատարած այցի շրջանակներում դեսպանը հանդիպում ունեցավ նաև Մագդեբուրգի քաղաքապետ Լուտց Թրումփերի հետ: Քաղաքապետը գոհունակությամբ նշեց, որ արդեն առկա են երկկողմ ուսումնական փոխանակման ծրագրեր: Ընթացիկ տարում Հայաստանից ճանաչողական այցով արդեն ժամանել է դպրոցականների մի խումբ, իսկ հաջորդ տարի պատասխան այցով Մագդեբուրգից ևս խումբ է մեկնելու Հայաստան: Հանդիպման ավարտին դեսպան Սմբատյանը գրառում կատարեց Մագդեբուրգի քաղաքապետարանի հյուրերի «Ոսկե գրքում»:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր