Հայ ձեռագրագիտական մշակույթին նվիրված գիտաժողով Բեռլինում

19 մարտի, 2016

Մարտի 14-18-ը Բեռլինի պետական գրադարանում կայացել է հայ ձեռագրագիտական մշակույթին նվիրված գիտաժողովը: Միջոցառումը կազմակերպվել է Բեռլինի պետական գրադարանի և Հալլե-Վիտենբերգի Մարտին Լյութերի անվան համալսարանի արևելագիտության ինստիտուտի համատեղ ջանքերով: Միջոցառմանը մասնակցում էին 15 երկրներից (ԱՄՆ, Անգլիա, Ֆրանսիա, Իտալիա, Բելգիա, Դանիա, Ռուսաստան, Չեխիա, Իսրայել, Հայաստան, Գերմանիա, Ավստրիա, Թուրքիա) ժամանած տարբեր գիտնականներ:

Բացման արարողությանը ողջույնի խոսքերով հանդես են եկել Բեռլինի պետական գրադարանի գլխավոր տնօրեն Բարբարա Շնայդեր-Կեփֆը և արևելագիտության բաժնի վարիչի տեղակալ՝ Մելինե Փեհլիվանյանը:
«Հայկական ձեռագրերի պատմությունը, կառուցվածքը և ուսումնասիրությունը» թեմայով ծավալուն զեկույցով հանդես է եկել Կալիֆորնիայի պետական համալսարանի պրոֆեսոր Տիգրան Կույումջյանը: Պաշտոնական արարողություններին հաջորդել է Բեռլինի պետական գրադարանի հայկական ֆոնդին պատկանող ձեռագրերի ցուցադրումը և ԳԴՀ-ում ՀՀ դեսպանության օժանդակությամբ կազմակերպված ընդունելությունը:

Աշխատանքային գիտաժողովի հինգ օրերի ընթացքում լուսաբանվել են ձեռագրերի գրչության և կազմարարական արվեստին, մանրանկարչական դպրոցներին, գրչության կենտրոններին, ձեռագրական հավաքածուների տեսակներին և ձեռագրերի կառուցվածքին (հիշատակարաններ, խորաններ և այլն) վերաբերող բազմաթիվ հարցեր: Հյուրերը հնարավորություն են ստացել այցելելու Պետական գրադարանի վերանորոգման բաժնի լաբորատորիաները, ուր նրանց ներկայացվել է ձեռագրերի վերականգնման մեթոդներն ու տեխնիկան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր