ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ

09 օգոստոսի, 2016

Հայկական մշակույթի օրեր Բեռլինում

2016թ. օգոստոսի 20-ից նոյեմբերի 6-ը Բեռլինում կանցկացվեն ՀՀ մշակույթի նախարարության, Գերմանիայում ՀՀ դեսպանության և Բեռլինի եվրոպական մշակույթների թանգարանի կողմից կազմակերպված հայկական մշակույթի օրեր: Բացման հանդիսավոր արաողությունը տեղի կունենա օգոստոսի 19-ին ժամը 18:00-ին Բեռլինի եվրոպական մշակույթների թանգարանում:

Մշակույթի օրերի ընթացքում Բեռլինի եվրոպական մշակույթների թանգարանում կցուցադրվի «Երազանքի օրեր» խորագրով Էրոլ Գուրիանի «terra arMenia» լուսանկարների շարքը: Հեղինակը լուսանկարահանել է տարբեր երկրներում բնակվող սփյուռքահայերի՝ ներկայացնելով նաև նրանց ընտանեկան պատմությունն ու երազային վայրերը Հայաստանում: Օգոստոսի 20-ին ցուցահանդեսի հեղինակը ներկաներին կպատմի իր ցուցաշարքի մասին:

Հայկական մշակութային օրերի պաշտոնական բացմանը ժամանակակից ջազի, ֆոլկի, ռոքի կատարումներով հանդես կգա «Միքայել Ոսկանյան և ընկերներ» էթնո-ջազային հայտնի համույթը: Նվագախումբը թառ հայկական նվագարանով ժամանակակից նոր երաժշտություն է ստեղծել Հայաստանում և հիմնականում հանդես է գալիս սեփական գործերի կատարումով, որոնք կրում են հայկական ժողովրդական երաժշտության կնիքը:

Սեպտեմբերի 22-ին Բեռլինի ֆիլհարմոնիկի կամերային երաժշտության դահլիճում համերգով հանդես կգա «Հայաստանի փոքրիկ երգիչներ» հանրահայտ երգչախումբը: Համերգը նվիրված է Հայաստանի Հանրապետության Անկախության 25-ամյակին և կանցկացվի Հայաստանի Հանրապետության արտգործնախարար Էդվարդ Նալբանդյանի և Գերմանիայի Դաշնային Հանրապետության արտգործնախարար դր. Ֆրանկ-Վալտեր Շթայնմայերի բարձր հովանու ներքո:

Մշակութային օրերի շրջանակներում կցուցադրվի 20-րդ դարի հայ հռչակավոր ռեժիսոր Սերգեյ Փարաջանովի «Նռան գույնը» գեղարվեստական կինոնկարը: Հայ և գերմանացի գիտնականների մասնակցությամբ կանցկացվեն մի շարք զեկույցներ և քննարկումներ տարաբնույթ թեմաներով` «Հայկական եկեղեցի – պատմություն և ներկա», «Հայկական գրատպության պատմությունը», «Հայաստան` Եվրոպայի դարպասն Արևելքում», «Հայրենիք-ինքնություն-հույզեր», «Հայերը Բեռլինում» և այլն:

Հայկական մշակութային օրերի ծրագրի մանրամասներին կարելի է ծանոթանալ այստեղ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր