Դեսպան Սմբատյանի հանդիպումը «Global Bridges» երիտասարդական կազմակերպության անդամների հետ

07 մարտի, 2017

Մարտի 7-ին Գերմանիայում ՀՀ դեսպան Աշոտ Սմբատյանը ՀՀ դեսպանությունում ընդունեց «Global Bridges» երիտասարդական կազմակերպության անդամներին՝ ի դեմս կազմակերպության նախագահ Հանս Ալբրեխտի և գործադիր տնօրեն Բեաթե Լինդեմանի։

Ողջունելով հյուրերին՝ դեսպան Սմբատյանն ընդգծեց երիտասարդության հետ շփումների կարևորությունը և տարբեր գործընթացներում նրանց դերակատարությունը։

Ներկաների խնդրանքով՝ դեսպանն անդրադարձավ ՀՀ արտաքին քաղաքականության առաջնահերթություններին, հայկական Սփյուռքի դերին, ինչպես նաև Արցախյան հակամարտությանը՝ ներկայացնելով ապրիլին Արցախի դեմ Ադրբեջանի սանձազերծած ագրեսիայի հետևանքները, դրանց հաղթահարման ուղղությամբ Հայաստանի և ԵԱՀԿ Մինսկի խմբի համանախագահ երկրների ջանքերը, ղարաբաղյան հիմնախնդրի կարգավորման գործընթացի ներկա փուլը և Ադրբեջանի ապակառուցողական կեցվածքը։

Այնուհետև, դեսպան Սմբատյանը պատասխանեց ներկաներին հուզող հարցերին, որոնք վերաբերում էին ՀՀ-ԵՄ հարաբերություններին, Արցախյան հիմնախնդրին, ԵԱՏՄ անդամակցությամբ Հայաստանի առջև բացված տնտեսական նոր հնարավորություններին և ՀՀ-ՌԴ համագործակցությանը։

Հանդիպման ավարտին «Global Bridges» կազմակերպության ղեկավարությունը մեծ գոհունակությամբ հիշատակեց կազմակերպության երիտասարդ առաջնորդների 15-րդ համաժողովը, որը 2016 թվականին տեղի էր ունեցել Երևանում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր