Արցախին նվիրված համերգ ԳԴՀ Ռոստոկ քաղաքում

17 հոկտեմբերի, 2020

Հոկտեմբերի 17-ին ԳԴՀ Ռոստոկ քաղաքի երաժշտության և թատրոնի կոնսերվատորիայում կայացավ բարեգործական համերգ` նվիրված Հայաստանին և Արցախին։

Բացման խոսքով հանդես եկավ բուհի ռեկտոր պրոֆեսոր Ռայնհարդ Շեֆերթյոնսը (Reinhard Schäfertöns), ով անդրադարձավ հայ ժողովրդի պատմությանը, Ֆրանց Վերֆելի «Մուսա լեռան 40 օրը» գրքին և իր համերաշխությունը հայտնեց հայ ժողովրդին։

Այնուհետև ողջույնի խոսքով հանդես եկավ ԳԴՀ-ում ՀՀ դեսպան Աշոտ Սմբատյանը, ով իր խոսքում նշեց, որ երաժշտությունն ունիվերսալ լեզու է ժողովուրդների փոխճանաչման և փոխըմբռնման համար։ Շնորհակալություն հայտնելով համերգի կազմակերպիչներին, համալսարանի ղեկավարությանը և պրոֆեսորադասախոսական կազմին` ՀՀ դեսպանը հակիրճ ներկայացրեց Լեռնային Ղարաբաղի հակամարտության ծագումնաբանությունը և ներկայումս ստեղծված իրավիճակը` հավելելով. «Գտվելով Եվրոպայում` բոլորս հիմնվում ենք հիմնարար արժեհամակարգային սկզբունքների վրա` ժողովրդավարություն, մարդու իրավունքներ, ազատություն։ Հարց է առաջանում, մի՞թե այս արժեհամակարգը չի կարող հավասարապես գործել նաև Լեռնային Ղարաբաղի Հանրապետության բնակչության համար, որպեսզի Արցախի յուրաքանչյուր քաղաքացի ունենա ազատ ապրելու, իրավունք ունենա իր ժողովրդավար երկրում` իր տանն արարելու և իրեն տրված մարդու իրավունքները լիարժեք իրագործելու»։

Համերգի ընթացքում Կոմիտասի, Խաչատրյանի, Բաբաջանյանի, Դեբյուսիի, Ռավելի, Մոցարտի, Շոպենի և այլոց ստեղծագործությունների կատարումներով հանդես եկան կոնսերվատորիայի հայ և օտարերկրյա դասախոսներն ու ուսանողները։

Համերգի ողջ հասույթը կփոխանցվի Հայ Առաքելական եկեղեցու Գերմանահայոց թեմի առաջնորդարան` Արցախում բարեգործական ծրագրեր իրականացնելու նպատակով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր