ԳԴՀ-ում ՀՀ դեսպան Աշոտ Սմբատյանի մամուլի ասուլիսը «korrespondenten.cafe» ակումբում

27 հոկտեմբերի, 2020

Հոկտեմբերի 27-ին ԳԴՀ-ում ՀՀ դեսպան Աշոտ Սմբատյանը, Բեռլինում գտնվող «korrespondenten.cafe» լրագրողների, քաղաքական գործիչների և դիվանագետների ակումբի հրավերով, մասնակցեց լրագրողների համար կազմակերպված մամուլի ասուլիսին, որին որպես երկրորդ բանախոս հրավիրված էր նաև Գերմանիայում Ադրբեջանի դեսպանը:

Իր բացման խոսքում ՀՀ դեսպանը նախ հակիրճ անդրադարձավ Լեռնային Ղարաբաղի հակամարտության պատմությանը, որից հետո մանրակրկիտ ներկայացրեց անկախությունից ի վեր հակամարտության կարգավորման շուրջ ընթացող բանակցությունները և հատկապես սեպտեմբերի 27-ին Ադրբեջանի կողմից Լեռնային Ղարաբաղի Հանրապետության դեմ սանձազերծված լայնածավալ ագրեսիան:

Լրագրողների տված բազմաթիվ հարցերին ի պատասխան՝ Ա. Սմբատյանը փաստերով ներկայացրեց իրական դրությունը, պատերազմում Թուքիայի անմիջական, լայնամասշտաբ և ապակայունացնող ներգրավվածությունը: ՀՀ դեսպանը, մասնավորապես, խոսեց նաև Սիրիայից և Միջին Արևելքի այլ երկրներից վարձկանների դեպի Ադրբեջան տեղափոխման մասին՝ ընդգծելով, որ ահաբեկչության տեղափոխումը Հարավային Կովկաս հղի է աղետալի հետևանքներով ողջ տարածաշրջանի և Եվրոպայի համար:

Ներկայացնելով Ադրբեջանի կողմից հումանիտար իրավունքի բազմաթիվ խախտումները և ռազմական հանցագործությունները, այդ թվում՝ քաղաքացիական բնակչության և օբյեկտների նպատակային թիրախավորումը, արգելված զինատեսակների կիրառումը և այլն՝ դեսպան Սմբատյանը հավելեց. «Ադրբեջանի դեսպանը, ինչպես և իր երկրի նախագահը, պարբերաբար նշում են, որ այս հակամարտությունում խոսքը գնում է տարածքների մասին: Եթե Ադրբեջանի համար Լեռնային Ղարաբաղը զուտ տարածք է, ապա Արցախի բնակչության համար խոսքը գնում է իրենց հայրենիքում բնակվող մարդկանց և նրանց ֆիզիկական գոյության մասին: Անթույլատրելի է մարդու իրավունքների ջատագով երկրների կողմից ընտրովի վերաբերմունքը տարբեր մարդկանց նկատմամբ»:

Հարցուպատասխանի ընթացքում ՀՀ դեսպանը պարբերաբար փաստերով և ապացույցներով հերքում էր Ադրբեջանի դեսպանի ստահոդ հայտարարությունները:

Տեսանյութը՝ https://bit.ly/2HHIrVp

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր