ԳԴՀ կանցլերի և կրթության ու հետազոտության դաշնային նախարարի վիրտուալ շրջայցը Բեռլինի ԹՈՒՄՈ կենտրոնում

18 հունիսի, 2021

Հունիսի 17-ին ԳԴՀ կանցլեր Անգելա Մերկելը և դաշնային կրթության և հետազոտության նախարար Անյա Կարլիչեկը վիրտուալ շրջայց կատարեցին Բեռլինի ԹՈՒՄՈ կենտրոնում:

Դաշնային կանցլեր Մերկելը 2018թ. Հայաստան կատարած իր պաշտոնական այցի շրջանակներում այցելել էր նաև Երևանի ԹՈՒՄՈ ստեղծարար տեխնոլոգիաների կենտրոնակայան: Ձեռք բերված երկկողմ պայմանավորվածությունների համաձայն՝ գերմանական կողմը սեղմ ժամկետներում սկսեց Գերմանիայում ԹՈՒՄՈ կենտրոնի բացման ուղղությամբ աշխատանքները: Եվ արդեն 2020թ. նոյեմբերից Բեռլինում, KfW բանկի ֆինանսավորմամբ, բացվեց Գերմանիայում առաջին ԹՈՒՄՈ կենտրոնը:

ԹՈՒՄՈ-ի կոնցեպտը մշակվել է Հայաստանում 2011թ.: Կենտրոնում 12-18 տարեկան երիտասարդներն անվճար հիմունքներով սովորում են թվային տեխնոլոգիաների բնագավառի գաղտնիքները, ինքնակրթության, ինչպես նաև դասընթացների և ուսումնական ճամփորդությունների միջոցով խորացնում իրենց գիտելիքները: Կրթական ծրագիրը բավական ընդգրկուն է. ծրագրավորումից մինչև ռոբոտիկա, գրաֆիկայից մինչև երաժշտություն և ֆիլմ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր