Armenian Colors Jazz Trio երաժտախմբի բարեգործական համերգը Բադեն-Բադենում

20 նոյեմբերի, 2023

Armenian Colors Jazz Trio երաժտախմբի բարեգործական հաջորդ համերգը՝ նվիրված աշխարհահռչակ կոմպոզիտոր և դիրիժոր Արամ Խաչատրյանի ծննդյան 120 ամյակին, կայացավ նոյեմբերի 17-ին Բադեն-Բադենում։ Համերգը դարձյալ կրում էր "Aram Khachaturian meets JAZZ" խորագիրը։

Համերգին իրենց ողջույնի խոսքն ասեցին Բադեն-Վյուրթեմբերգ երկրամասում ՀՀ պատվավոր հյուպատոս Գյունթեր Պիլարսկին և ՀՀ առևտրաարդյունաբերական պալատի ներկայացուցիչ Ռոբերտ Վ. Հուբերը և Գերմանահայկական Երաշտական Միության Նախագահ Անի Աղաբեկյանը:

Հնչեցին Արամ Խաչատրյանի հայտնի ստեղծագործությունները՝ ջազային մեկնաբանմամբ, այդ թվում՝ աշխարհում հայտնի Խաչատրյանի «Սուսերով Պարը», Մեծն Կոմիտասի ստեղծագործությունները: Համերգի վերջում հնչեց Վահագն Հայրապետյանի խորհրդանշական համարվող հեղինակային «Խաղաղություն» (Peace) ստեղծագործությունը:

Համերգն արժանացավ հանդիսատեսի ջերմ հոտնկայս ծափահարություններին, որոնց թվում էին հայ համայնքի ներկայացուցիչներ ոչ միայն Գերմանիայից, այլև Ֆրանսիայից և ջազի այլ սիրահարներ։

Նշենք, որ տոմսերի վաճառքից գոյացած հասույթը կփոխանցվի Գերմանիայում Հայ Օգնական Միությանը՝ Արցախից բռնի տեղահանված հայ ընտանիքներին աջակցության նպատակով:

Համերգը կայացավ Գերմանիայում ՀՀ դեսպանության նախաձեռնությամբ։ Համերգի հովանավորներն էին ՀՀ ԿԳՄՍ նախարարությունը և Բադեն-Վյուրթեմբերգ երկրամասում ՀՀ պատվավոր հյուպատոս Գյունթեր Պիլարսկին: Համերգին աջակցեց Գերմանահայկական Երաժշտական Միությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր