Հայաստանը մասնակցում է ITB հեղինակավոր զբոսաշրջային ցուցահանդեսին

03 մարտի, 2026

Հայաստանը մասնակցում է ITB հեղինակավոր զբոսաշրջային ցուցահանդեսին։ Այս տարի ITB Բեռլինը՝ զբոսաշրջության աշխարհի ամենաազդեցիկ բիզնես հարթակը, նշում է իր 60-ամյա հոբելյանը՝ առավել ընդգրկուն և ապագային միտված իր ծրագրով միավորելով աշխարհի զբոսաշրջային քարտեզը մեկ հարթակում։

Հայաստանից ժամանած պատվիրակությունը՝ ՀՀ Զբոսաշրջության կոմիտեի նախագահ Լուսինե Գևորգյանի գլխավորությամբ, սեփական ազգային տաղավարով ակտիվ մասնակցում է ITB Berlin 2026-ին։ Այս տարի Հայաստանը ներկայացնում է 9 զբոսաշրջային ընկերություն: Պետական և մասնավոր հատվածի ներկայացուցիչները կներկայացնեն Հայաստանը որպես անվտանգ և բազմաոլորտ ճանապարհորդային ուղղություն, կխթանեն գործարար կապերը միջազգային գործընկերների հետ, կցուցադրեն մշակութային, գաստրոնոմիական և արկածային զբոսաշրջության հնարավորությունները՝ այդպիսով ամրապնդելով Հայաստանի դիրքերը միջազգային զբոսաշրջային շուկայում։

Սաքսոնիա-Անհալթ երկրամասի Լանդթագի նախագահ Գուննար Շելենբերգերը և դեսպան Ենգիբարյանը շրջայց կատարեցին Հայաստանի տաղավարում, ծանոթացան գործարարների հետ և քննարկեցին համագործակցությանն առնչվող հարցեր։

ITB մասնակիցներին և հյուրերին իր գեղեցիկ պարերով հայկական ազգային մշակույթը ներկայացրեց նաև Բեռլինի հայկական "Հայեցի" պարային համույթը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր