ՀՀ դեսպանը հանդիպեց Բունդեսթագի պատգամավորների հետ

21 մայիսի, 2026

ՀՀ դեսպան Վիկտոր Ենգիբարյանը հանդիպում ունեցավ Բունդեսթագի Արտաքին հարաբերությունների հանձնաժողովի Ճգնաժամերի կանխարգելման, ռազմավարական կանխատեսումների, կայունացման և խաղաղության խթանման ենթահանձնաժողովի պատգամավորներ Յոհաննես Ֆոլկմանի (ՔԴՄ/ՔՍՄ), Յուլիան Յոզվիգի (Ալյանս 90/Կանաչներ), Շառլոտ Նոյհոյզերի (Ձախեր), Դենիս Պաուլիի (Այլընտրանք Գերմանիայի համար) հետ։

Հանդիպման ընթացքում քննարկեցին ենթահանձնաժողովի պատվիրակության Հայաստան նախատեսվող այցին առնչվող հարցեր։ Մտքեր փոխանակեցին տարածաշրջանային և միջազգային օրակարգային թեմաների շուրջ։ Անդրադարձան Հայաստանի ու Գերմանիայի միջև երկկողմ գործընկերության ռազմավարական օրակարգին, Երևանում անցկացված Եվրոպական քաղաքական համայնքի գագաթնաժողովին, ինչպես նաև Հայաստան-ԵՄ գործընկերության ռազմավարական օրակարգին և ՀՀ-ԵՄ գործընկերության ուղղությամբ ընթացող զարգացումներին։

Զրույցի ընթացքում քննարկվեցին նաև Հայաստան-Ադրբեջան և Հայաստան-Թուրքիա հարաբերություններին առնչվող հարցեր։ Դեսպանը ներկայացրեց տարածաշրջանային խաղաղության և կայունության հաստատմանն ուղղված Հայաստանի ջանքերը, ինչպես նաև «Խաղաղության խաչմերուկ» նախաձեռնությունը և դրա շրջանակում իրականացվող աշխատանքները, այդ թվում՝ ԹՐԻՓՓ նախագծի իրագործման ընթացքը։

Դեսպան Ենգիբարյանը նշեց, որ տարածաշրջանային խաղաղության հաստատման արդյունքում Հայաստանում բացվել է շահավետ ներդրումների իրականացման նոր ժամանակաշրջան և հրավիրեց գերմանական ընկերություններին ակտիվորեն օգտվել ստեղծված հնարավորություններից։

Դեսպանը շնորհակալություն հայտնեց պատգամավորներին արդյունավետ հանդիպման և կառուցողական քննարկման համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր