Հայաստան-Գերմանիա համագործակցության օրակարգը շարունակաբար կընդլայնվի

29 սեպտեմբերի, 2026

Գերմանիայի Դաշնային Հանրապետությունում Հայաստանի Հանրապետության դեսպան Վիկտոր Ենգիբարյանն ընդունել է Գերմանական միջազգային համագործակցության ընկերակցության (GIZ) Գերմանիայի, Եվրոպայի և Հարավային Կովկասի վարչության ղեկավար Բաստիան Ֆայգելին և Հայաստանում GIZ-ի նորանշանակ տնօրեն դր. Սոնյա Կուրցին։

Հանդիպման ընթացքում ՀՀ դեսպանը գոհունակություն է հայտնել Հայաստանի և Գերմանիայի միջև քաղաքական երկխոսության բարձր մակարդակի առնչությամբ՝ ընդգծելով երկկողմ օրակարգի շարունակական ընդլայնման և խորացման կարևորությունը։ Այս համատեքստում անդրադարձ է կատարվել Հայաստանի և Գերմանիայի միջև երկկողմ գործընկերության ռազմավարական օրակարգի վերաբերյալ համատեղ հռչակագրին, որն ընդգրկում է համագործակցության մի շարք քաղաքական և տնտեսական ուղղություններ։

Անդրադարձ է կատարվել Հայաստանում GIZ-ի գործունեությանը, մասնավորապես տնտեսական և էներգետիկ ոլորտներում արձանագրված արդյունքներին:

Զրուցակիցները մտքեր են փոխանակել նաև համագործակցության ընդլայնման և նոր ծրագրերի ու նախաձեռնությունների իրականացման հնարավորությունների շուրջ։ Համագործակցության հետագա խորացմանն ուղղված քայլերը քննարկելու և այն բովանդակային նոր ուղղություններով հարստացնելու նպատակով առաջիկայում Հայաստան կայցելի Գերմանիայի Դաշնային Հանրապետության Տնտեսական համագործակցության և զարգացման դաշնային նախարարության պատվիրակությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր