Շլեզվիգ-Հոլշթայն երկրամասում բացվեց ՀՀ պատվավոր հյուպատոսություն (Համբուրգի հետ համատեղությամբ)

06 նոյեմբերի, 2026

Նոյեմբերի 4-ին Գերմանիայում Հայաստանի Հանրապետության դեսպան Վիկտոր Ենգիբարյանի և Համբուրգում ու Շլեզվիգ-Հոլշթայն երկրամասում Հայաստանի Հանրապետության պատվավոր հյուպատոս Հայկո Հեխթի կողմից կատարվեց Շլեզվիգ-Հոլշթայն երկրամասում Հայաստանի Հանրապետության պատվավոր հյուպատոսության բացման պաշտոնական արարողությունը (նստավայրը՝ Համբուրգ):

Դեսպան Վիկտոր Ենգիբարյանն իր խոսքում ընդգծեց, որ Շլեզվիգ-Հոլշթայն երկրամասում պատվավոր հյուպատոսության բացումը ևս մեկ անգամ վերահաստատում է Հայաստանի պատրաստակամությունը՝ խորացնել փոխշահավետ համագործակցությունը նաև Գերմանիայի առանձին երկրամասերի հետ՝ հիմնված երկու պետությունների միջև ձևավորված բարեկամության և փոխվստահության վրա:

Շնորհավորելով Հայկո Հեխթին՝ հյուպատոսական շրջանի ընդլայնման առթիվ՝ դեսպան Ենգիբարյանը հույս հայտնեց, որ պատվավոր հյուպատոսության գործունեությունը մոտ ապագայում կդրսևորվի գործնական արդյունքներով, մասնավորապես՝ փոխշահավետ առևտրատնտեսական և մշակութային-կրթական նախագծերի իրականացմամբ։

Երախտագիտություն հայտնելով վստահության համար՝ պատվավոր հյուպատոս Հայկո Հեխթն ընդգծեց երկկողմ համագործակցության զարգացմանն աջակցելու իր պատրաստակամության մասին։
Պատվավոր հյուպատոսության պաշտոնական բացման արարողությանը հաջորդեց ՀՀ անկախության 35-ամյակին նվիրված տոնական ընդունելություն Համբուրգ քաղաքում:

Շլեզվիգ-Հոլշթայնը Գերմանիայի ամենահյուսիսային դաշնային երկրամասն է և միակը, որը միաժամանակ սահմանակից է երկու ծովերի՝ Հյուսիսային և Բալթիկ։ Այս աշխարհագրական դիրքով է պայմանավորված երկրամասի հիմնական տնտեսական և մշակութային առանձնահատկությունները: Երկրամասն առաջատար է համարվում հատկապես վերականգնվող էներգետիկայի, տեղեկատվական տեխնոլոգիաների, զբոսաշրջության և այլ բնագավառներում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր