Հայոց ցեղասպանության զոհերի հիշատակին նվիրված խաչքարի բացում Բեռլինում

24 ապրիլի, 2016

Ապրիլի 23-ին ԳԴՀ մայրաքաղաք Բեռլինի կենտրոնում` Սուրբ Հեդվիգի տաճարի բակում, Հայ Առաքելական Եկեղեցու Գերմանիայի Թեմի առաջնորդ Գարեգին արքեպիսկոպոս Բեկչյանի ձեռամբ օծվեց Հայոց Ցեղասպանության անմեղ զոհերի հիշատակին նվիրված խաչքար:

Էկումենիկ ծեսով իրականացված օծմանը մասնակցեցին նաև Բեռլին-Բրանդենբուրգ երկրամասի կաթոլիկ եկեղեցու դիվանապետ Թոբիաս Պրչուտարսկին և տարածաշրջանի բողոքական եկեղեցու առաջնորդ Ուլրիքե Թրաութվայնը:

Բացման խոսքով հանդես եկան ՀՀ դեսպան Աշոտ Սմբատյանը և Գերմանահայկական ընկերակցության նախագահ Րաֆֆի Կանտյանը: ՀՀ դեսպանն իր ելույթում նշեց, որ հուշարձանը, վեր խոյանալով Գերմանիայի պատմության թանգարանի առջև, հնարավորություն կտա հատկապես երիտասարդ սերնդին առճակատվելու Օսմանյան կայսրության պատմության այս հատվածի հետ, որը համընդհանուր եվրոպական հիշողության մի մասն է:

Արարողության ավարտին գերմանացի դուդուկահարուհի Կարոլինա Այսլերը ներկաների համար կատարել է Կոմիտասի ստեղծագործությունները:

Միջոցառմանը ներկա էին Բունդեսթագի փոխնախագահ Պետրա Փաուն, Դաշնային և երկրամասային խորհրդարանների անդամներ, ԳԴՀ կառավարության և ԱԳՆ բարձրաստիճան պաշտոնյաներ, ԳԴՀ-ում հավատարմագրված դեսպաններ և դիվանագետներ, լրագրողներ, հայ համայնքի ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր