Հայկական մշակութային օրեր Գերմանիայի Բադեն-Վյուրթեմբերգ երկրամասում

28 հոկտեմբերի, 2017

Հոկտեմբերի 26-ին ԳԴՀ Բադեն-Վյուրթեմբերգ երկրամասի մայրաքաղաք Շտուտգարտում մեկնարկեցին արդեն ավանդական դարձած հայկական մշակութային օրերը: Այս տարվա միոցառումները կանցկացվեն «Մաշտոցը հանդիպեց Լյութերին - մշակույթների հանդիպում» խորագրի ներքո: Հայկական մշակութային օրերի հարուստ և բազմազան ծրագրի նպատակն է գերմանացի հասարակությանը ներկայացնել հայ ժողովրդի հարուստ պատմական ժառանգությունը, մշակույթն ու ավանդույթները: Այս տարվա միջոցառումների բազմաբնույթ ցանկում առաջին անգամ ընդգրկվել էր նաև հայկական տարազների և գորգերի ցուցադրումը՝ «Տերյան մշակութային կենտրոն»-ի արվեստագետների ներկայացմամբ:

Մեկշաբաթյա ծրագրի մաս էին կազմում Էրլանգենի համալսարանի աստավածաբանության պրոֆեսոր Խաչիկ Գազերի «Հայ ավետարանական եկեղեցու պատմությունն ու գերմանացի միսիոներների դերը» թեմայով դասախոսությունը, «Աստված հարստացրել է իմ կյանքը» գրքի շնորհանդեսը, Ռաֆայել Հովհաննիսյանի «Հայկական հետքեր Բադեն-Վյուրթեմբերգում» փաստավավերագրական ֆիլմի ներկայացումը, Շտուտգարտի ջազային նվագախմբի համատեղ ելույթը ՀՀ վաստակավոր արտիստ Էմմա Պետրոսյանի, Արամոյի և Մադաթ Ավանեսովի հետ միասին:

Հոկտեմբերի 28-ին կատարվեցին Տիգրան Մանսուրյանի ստեղծագործությունները: Ներկաները բուռն ծափահարություններով ողջունեցին մաեստրո Մանսուրյանին, ով իր երախտագիտությունը հայտնեց հայ երաժիշտներին:

Ողջույնի խոսքով հանդես եկան Գերմանիայում ՀՀ դեսպան Աշոտ Սմբատյանն ու Բադեն-Վյուրթեմբերգ երկրամասում ՀԱԵ հոգևոր հովիվ Տիրատուր Սարդարյանը:

Կատարումներով հանդես եկան դաշնակահարներ Ռուբեն Մելիքսեթյանը, Իզաբելա Մելքոնյանը, երգչուհի Աննա Ավդալյանը, թավջութակահար Վաչե Բագրատունին և ջութակահար Քրիստինա Ալթունյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր